給最討厭的路比(Ruby)

唉!屋企忽然之間變得好冷清,平時擺放5支牙刷嘅位置而家只得3支,我覺得有點兒害怕同無奈,仲有少許心寒,老豆剛去逝一年未夠,而家妳又唉!

我見到妳塊臉有好多血呀,妳當時係米好痛呀?有冇喊呀?有冇大聲叫媽咪同家姐呀?我同媽咪個心好痛真係好痛!

妳嘅離開我真係冇辦法去接受同面對,唉!我好討厭妳,好憎妳同恨妳,妳粒聲唔出就咁走咗去,妳覺得家姐嘅肩膊未夠重咩?妳估家姐可以繼續振作落去?我地仲有好多野都未做,妳唔記得咩!我地都仲未睇到流星雨!我地話上年嘅新年過得唔開心,今年要開心啲,全家人一齊去旅行過年,再唔係就去迪士尼或者海洋公園。仲有呀!妳話公司嚟咗個鬼佬上司,妳怕同佢溝通唔到,驚冇咗份工,所以決定報夜校學好啲英文,而我呢!就因為想做個麵餅師所以去學整糕餅,我地話過比一年時間自己,大家都要努力加油!唔好放棄!妳仲講過,妳會同我一齊養大B仔、一齊照顧媽咪到老、一齊去韱體減肥,如果妳嫁唔出,仲會同我一齊儲錢買間姑婆屋住添!

唉!每朝早一起身我就即刻望向上格床,希望可以見到妳,希望自己頭先只係發咗場惡夢!

由細到大妳都係一個唔多鍾意講野又靜好受人保護嘅女仔,老豆同媽咪仲驚妳有自閉症,而我就同妳剛剛相反,十分任性嘅我,無時無刻都令老豆同媽咪非常激氣,其實我好羨慕有咁多人去愛錫妳、關心妳,妳亦希望好似我咁能夠勇於表達自己嘅內心世界、又有自信又硬朗、容易交朋結友。我同妳講過(人係無十全十美,個世界唔會因為妳而停留不變,如果要變就要自己去改變)。我好應同妳加入車會,我覺得妳好應該去打開個心窗,行前一步,廣闊自己嘅生活圈子,所以我從來都冇反對過,仲幫妳慢慢去解釋比老豆同媽咪聽等佢地明白接受。唉!其實我問過自己,如果當初我同樣地反對妳去揸電單車,今日發生嘅事又會否出現呢?不過我好很定,妳嘅選擇係冇錯嫁,因為妳係裡面擁有過嘅喜與悲所有一切,相信係其它地方妳未必可以得到哩種感覺。

我知道妳曾經埋怨過家姐刻意去改變自己嘅性格,唔鍾意出聲又全無自信,喜歡收埋自己唔想去街!唉!希望細妹妳能夠明白,點解家姐一直都想去學手語,點解想同啲殘疾或者失明嘅人做朋友,因為佢地嘅思想比交單純,相比同一般正常人相處會更加舒服,至少就算比佢地傷害倒,個傷口都冇咁深、冇咁痛!我更希望妳能夠諒解已為人母嘅家姐,經常自責自己無法比到B仔一個完整嘅家庭,從未感常過父親嘅氣味,所以身兼父母兩職嘅家姐,唔可能像以往咁係出面四圍亂跑、盲衝直撞,做每一件事都必須要三思而後行。我知道細妹妳好想家姐開心好似以前咁開朗,每次車會或者其它一有活動妳都好希望我能夠一齊出席,唔想我活埋自己。只不過係友情同愛情路上受過錯敗嘅我,要忘記過去企番起身真係件好困難嘅事!

仲記得以前細個比媽咪打,我一定會企係前面欄住唔比佢打妳,記得有一次,我一手檔住媽咪,即刻拉埋妳走入厠所,仲以為鎖住自己幾分鐘就可以逃過媽咪一劫,點知出到嚟都係要比佢打一身,佢話我大唔好教壞細,所以淨係打我一個。仲有呀!媽咪話汽水薯片冇益所以好小買比我地食,記唔記得呀?我地留番啲零用錢成日靜雞雞買咗係留下食埋先番屋企,我地兩個仲會偷偷地望住對方笑,其實媽咪知嫁,只不過佢冇識穿我地咋!我地第一次考到車牌,大家都搵對方做第一個乘客,須然我地唔係同一時間考試,但係好自然考完試就即刻打電話將自己嘅喜悅通知對方!我地每次一齊睇嚫笑片,都會攬住個肚流曬眼淚,查實係因為見到對方笑到喊,所以跟住米笑到肚痛囖!仲有?有時媽咪會煮一大煲肥油湯又或者一啲唔合我地口味嘅餸,但以免令媽咪唔高興,我同妳為有係枱底猜包剪泵,輸咗果個就要食多份!哈哈!每隔兩個月我地一定會去超市掃貨,記得有一次惠康特價,我同妳每人攬住4包【姨媽巾】仲有洗頭水同皂液,就咁行去收銀處,攪到排前面個男仔鬼咁尷尬!仲有!妳同B仔對腳好鬼大汗,每次去完街番屋企,果陣惡臭味仲要兩個笑住行嚟行去,臭死我同媽咪!仲有呀!我地嘅衣著眼光都差唔多,所以屋企啲衫褲鞋襪大多數都係我同妳行街一齊買嘅,我地仲會撈亂著添,不過唔知點解,好多第一次見我地嘅朋友或者Sales佢地都話我同妳似朋友多啲,因為兩姐妹好小好似我地兩個感情咁好!我地行街最合拍嘅就係見到啲怪異鬼鼠嘅人同埋啲『靚仔』,當遇到,我同妳對眼好自然會望望佢地,然後我地再對望一下,跟住就會一齊笑,我同妳只靠個眼神,唔洗講嘢已經知道對方諗啲咩,就係默契!

唉!老豆走咗反而令我地三個變得輕鬆咗,唔洗每日眼見佢比病魔接磿,亦唔洗見到媽咪每日出入醫院最少兩次照顧老豆咁辛苦!記得有次我妳媽咪三個行街,媽咪忽然講起「老來都唔知點算」,我同妳打個眼式,即刻上演一幕【推亞媽過馬路】妳拉我推,我地邊行邊笑邊講「老嘅時候我地米就咁對代妳囖」!哈哈哈!我地三個加埋B仔每次去街番屋企經過便利店都會入去行個圈,跟住每人一支甜筒行出嚟,妳話我白痴,我笑妳底B4個邊行邊玩一齊番屋企!係屋企我同妳好鍾意夾住B仔係中間扮人肉三文治,又或者我同妳捉住B仔對手腳,好似十大酷刑咁,媽咪就扮挖鼻屎比佢食,都唔知有咩好玩,只不過我地4個又真係玩得好開心!

唉!可惜過往嘅歡笑聲已經唔再係屋企出現,亦唔會再出現因小問題而同我一齊發出嘅嘈吵聲,再冇人同我爭厠所,冇人會同我一齊咁無聊兩條友去爆房唱K、係酒吧吧面坐成晚、揸住支Diamond Black係留下坐公園,冇人會買條牛仔褲比我當賴屎褲著,仲有好多好多永世都講唔完嘅姐妹感情!

妳係另一個世界生活點呀?有冇比人蝦呢!有冇見番老豆呀?以後妳要照顧自己,家姐再保護唔到妳啦!

哩兩日係家姐伴妳行人生最後嘅一段路,咁日後家姐冇咗妳日後嘅路又應該點樣行呀?又有邊個可以能夠補上妳嘅缺位呢?

廣告
本篇發表於 未分類。將永久鏈結加入書籤。

One Response to 給最討厭的路比(Ruby)

  1. Alan 說道:

    人必須面對生老病死,珍惜擁有。加油…

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s